Vajzat dhe gratë përveç që janë viktimat më të shpeshta të dhunës, shumë herë edhe kërcënohen, shantazhohen e detyrohen të veprojnë kundër vullnetit të tyre nga burrat apo personat me të cilët kanë pasur raporte të afërta. Një rast i tillë ka ndodhur edhe të hënën në mbrëmje, në një banesë në Fushë Kosovë, raporton Gazeta Sinjali.
Këtë herë, viktimë është një 40-vjeçare, e cila është sulmuar nga një person, për motive akoma të panjohura.
Sinjali ka mësuar se rasti ka ndodhur pak para mesnatës, kur i dyshuari i kishte shkuar viktimës te banesa ku jeton dhe fillimisht kanë pasur një konflikt verbal.
Më pas, i dyshuari ka vazhduar me ofendime e kërcënime për publikimin e disa videove që pretendon se i posedon, duke i shkaktuar shqetësim e frikë viktimës.
Për të mos mbaruar me kaq, të njëjtat burime thonë se i dyshuari ka eskaluar në sulm, duke e goditur viktimën me grushte e shqelma.
Si pasojë e dhunës së ushtruar ndaj saj, 40-vjeçarja ka marrë trajtim mjekësor, ndërsa i dyshuari është arrestuar dhe shoqëruar në stacion policor.
Ndaj tij, Prokurori i Shtetit ka urdhëruar masën e ndalimit policor dhe inicimin e rastit në drejtim të veprave “Lëndim i lehtë trupor” dhe “Shtrëngim”.
/GazetaSinjali/